Petronor, 2019ko Saria

Petronorrek Jose Ignacio Arrieta Enpresa eta Gizartea Saria jaso du bere lehen edizioan. Estrategia Empresarial argitalpenak, BBKrekin eta Eusko Jaurlaritzako Enplegu eta Gizarte Politika Sailarekin batera antolatutako sari honetako epaimahaiak inguruko kolektiboei laguntzeko egindako lana nabarmendu du, petrolio enpresa azken hamarkadetan egiten ari den gizarte eta ingurumen arloko ekintzen bidez.

Enpresa, erakunde eta gizarte arloetako 200 lagunetik gora, Beatriz Artolazabal eta María Jesús San José Eusko Jaurlaritzako Enplegu eta Gizarte Politika eta Lan eta Justizia Sailburuak buru zirela, saria emateko ekitaldian parte hartzeko bildu ziren joan zen irailaren 23an Bilboko BBK Aretoan.

Eusko Jaurlaritzaren, BBKren, Confebasken eta Estrategia Empresarial argitalpenaren ordezkariek osatu duten Epaimahaiaren erabakian adierazten denez, Petronorrek hainbat hamarkada daramatza gizarte arloko ekintzak egiten, baita gizarte erantzukizun terminoa erabiltzen hasi baino lehen ere. Eta mota guztietako ekimenak babestuz egiten du, bai proiektu handiak, bai tokiko ekimen txikiagoak ere, leku bakoitzeko kolektiboekin. Gainera, ingurumenarekiko konpromisoan eta gardentasunean nabarmendu da, lege-eskakizunetatik askoz harago joanez. Azkenik, bere 50 urte baino gehiagotan zehar herrialde konpromiso sendoa erakutsi duela nabarmendu du, eta horrek bat egiten du Jose Ignacio Arrietaren konpromisoarekin.

Saria jasotzean, Emiliano López Atxurra Petronorreko presidenteak oroitzapenezko hitz maitagarriak izan zituen Jose Ignacio Arrietarentzat. Herrialdea eraikitzeko proiektuen aldeko apustua egiten zuen gizonaren figura nabarmendu zuen, petrolio enpresak bezala. Horregatik guztiarengatik, “sari hori jasotzea harro egoteko modukoa zela” adierazi zuen, “Arrieta enpresarekin eta gizartearekin konprometitutako pertsona zelako”. Gainera, Petronorrek enpresa erantzukizuna konpainiaren “bihotzean” daramala adierazi zuen, berezko ezaugarri gisa.

Bestalde, Nora Sarasola, BBKko Gizarte Ekintzako zuzendariak nabarmendu zuenez, “saria beharrezkoa da, eta Jose Ignacio Arrietaren figura eta ibilbidea gogorarazteko sortu da; bere bizitza profesional osoan zehar oso ukitu soziala erakutsi zuen bere enpresa-zereginetan, eta enpresek gizartearekin izan behar duten inplikazioaren defendatzaile sutsua izan zen”.

Amaieran, Beatriz Artolazabal Eusko Jaurlaritzako Enplegu eta Gizarte Politika Sailburuak Petronor zoriondu ondoren, zera adierazi zuen: “Arrietak ikuspegi sozial handia izan zuen. 80ko hamarkadako Eusko Jaurlaritza haiek, industriaren birmoldaketa handi baten garaian, izan zuten bezala. Gehien behar zutenei, pertsona ahulenei, arreta eskaintzeko eman ziren pausoek lortu dute Euskadi kohesionatuago egotea eta gizartean hausturarik ez ikustea”.

Saria emateko ekitaldian, Castellóko Unibertsitateko Enpresa Etikako katedradun eta Etnor Fundazioko Proiektu zuzendaria den Domingo García-Marzá irakasleak, “Enpresa Etika: Enpresen Gizarte Erantzukizunerako esparru etikoa” gaiari buruzko hitzaldia eman zuen.

Estrategia Empresarial argitalpena kaleratzen duen enpresaren presidente izandakoa oroitzeko eta omentzeko sortutako Enpresa eta Gizartea - Jose Ignacio Arrieta Sariaren lehen edizioak, arrakasta handia izan du deialdian, guztira 18 hautagaitza jaso baititu, enpresa handiak, Petronor irabazlea, besteak beste, ETEak eta norbanakoak, hain zuzen ere.